受訪者基本的資料
名姓:李新發
佮我ê關係:阿公
年歲:86歲
佗厝內排行:第二
佗位人:宜蘭壯圍鄉
蹛過啥物所在:台北州宜蘭郡土圍庄古亭笨
讀過啥物學校:有讀一年日本軍官學校(為了一寡福利)古亭國小讀六年,畢業就光復
食過啥物頭路:基本上為著照顧弟妹,啥物工課攏作,攏是雜工抑是作農
受訪者ê人生中，較大項ê代誌抑是受訪者感覺較值得講ê代誌:
阿公民國18年出生佇當時叫作台北州宜蘭郡土圍庄古亭笨,因為土地有重新規劃過所以這馬叫作宜蘭壯圍鄉,正確的位,阿公講這馬嘛認袂出來,阿公對伊細漢發生的事印象較深,阿公講當時生活非常艱苦,定定無物件通吃,猶閣因為阿公的老爸是一個無負責的筊鬼,將厝里的代誌攏丟予阿祖,但是對一个女人來講欲擔起一个家可能壓力傷過大,厝里猶閣無通吃,所以佇阿公九歲的時陣就改嫁,厝里規陣囡仔就變作阿公愛照顧,擔起厝內底的經濟,照顧好弟弟妹妹,阿祖雖然改嫁咧,伊嘛定定偷偷拿錢抑是一寡生活物件轉來,按閣阿公抑是無法度原諒伊,心內一直怨恨伊彼當時那會這呢雄放捒𪜶,直到這規年才漸漸有去伊的墓攑香,為著支持厝里的生活,阿公基本上啥物工課攏作過,甚至是去予人做長工,最後閣予頭家招,變作子婿,結婚後𪜶就家己搬出來生活,生活抑是過了非常艱苦,囡仔嘛一个一个出世,閣有兩个囡仔因為破病無錢通醫,一个是拄出世無外久,另外一个是七歲的時染著傳染病,只好目睭金金看𪜶過身,實在是真無奈!阿公的學歷無高,但是毋是無愛讀是無法度讀,當時會去讀日本軍官學校嘛是因為會當予厝里有更多福利才去咧,親像國小畢業了後就光復,但是對於有受到一寡日本教育的阿公來說,講話生活攏愛重新適應,出外去吃頭路的規定嘛有一些改變,伊43歲的時,身體出真大的問題,但是依彼當時的醫療佮厝里的經濟狀況,根本無法度治療,只好在厝里歇睏將經濟的重擔交予阿嬤,阿嬤靠著替人洗衣煮飯維持厝里的經濟,一直到我的阿爸十幾歲會當出去賺錢的時,厝里才比較好過,阿公講人生走到這,已經無啥物遺憾,因為「艱苦嘛一天,歡喜嘛一天」伊講人生中有足濟無奈佮無常,拄到的時陣,人攏會選擇逃避抑是意志消沉,無法度走出來,就按呢虛度一生,「人,好䆀攏是看你家己,心正,作啥物攏會成;心哪不正,作閣卡多攏無效」佇阿公的人生當中,拄到真濟難關,包括伊的老爸佇伊十六的時,因為不明原因就過身,當當時伊的小弟上細漢的才三个月爾爾,面對著老爸的過身,老母的改嫁,規个家無像家,才十六歲的伊,是按怎行過來,聽了阿公的故事了後,感覺阿公足利害佮堅強,嘛感覺咱實在足幸福,會當活佇這个啥物攏免煩惱的時代,我想若是我拄著遮的代誌,我無法度遮呢堅強,更加無可能會當將遮的故事分享予我的序細聽。
會使問受訪者對台灣近現代ê較大ê事件，是m̄是有親身參與抑是身邊發生ê:
佇我訪問阿公的過程當中,只要問到有關政治的問題,阿公攏無啥物欲理我,因為佇阿公彼的無自由的年代講政治是一種禁忌,隨時攏可能予抓去關,所以親像阿公這種佇田裡的作穡人,毋但愛看天公伯食飯,嘛閣愛看政府欲予你一嘴飯食無,毋管是國民政府抑是日本政府攏仝款,只要你對政府有意見,你就有可能予人抓,所以阿公講:「莫講政府的不好」甚至是這馬這呢開化自由的時代,伊抑是無佮意講關於政治的代誌,看的出來頂一輩人對政治的驚惶佮無信任,阿公講佇日本統治的時代社會較有秩序治安好,醫療衛生嘛比較好,破病的人攏會使去衛生所看醫生,伊佇彼當時每工攏有工課作,之後換國民政府的時,其實一開始無啥物分別,阿公講國民政府拄過來的時真正閣無䆀,但是蔣中正過身了後,就變足䆀,毋管是政治抑是經濟攏仝款,因為就明顯感受著工課較劣揣,物價攑高,社會瀰漫著一種予人無啥快活的氣氛,按閣一个小小的作穡人猶閣會當改變啥,只有好好顧好家己的腹肚就好,哪有時間佮心神去管政治,只有彼當時有錢有勢有智識的人才有可能去管政治,聽著我欲寫報告,阿公本來毋愛講因為伊怕我寫出來了後,予人點名作記號,按閣如果講無透過頂一輩的講述,咱永遠攏毋知影彼段時間所發生的歷史。至於有啥物較大的代誌,阿公講:「平安就是福」伊會記得較大的天災大概就是921大地動,因為彼當時伊佇厝里睏,雖然毋是佇地動的地點,按閣猶是搖甲足利害,隔工就看電視才知影災情遮嚴重,另外一個是阿公會記得有一年有一个風颱,袂記得伊叫啥物名,落雨落足濟工,予規个北部地區攏作大水,當時阿公兜的家俱嘛攏泡水,袂當用,田裡的稻仔攏死去,損失嘛真嚴重。
訪談後家己ê心得:
真感謝予這个作業會當訪問家己的序大,這是平常時無啥可能的體驗,嘛是因為按呢予平常時無啥物接觸的序大佮序細,有一段專屬的時間靜靜仔聽序大講較早的代誌,嘛是這擺的作業予我有機會,更加了解台灣的歷史,因為以早攏是對課本頂懸讀著,毋閣這擺是對家己的序大的角度,來看台灣的歷史,實在是真趣味,因為按呢我才理解講課本頂懸寫著好的代誌無一定就是好,畢竟編課本的人是現代人,伊用的是這馬的思想去寫以早的代誌,所以當然無知影彼當時的人對彼的事件的感覺佮看法,𪜶佇編寫時甚至是加上伊家己個人的想法,親像這擺教育部修課綱的代誌,我就感覺上過凊彩,畢竟歷史是人民對文化佮國家認同的基本,自細漢課本教啥物,以後大漢後就會認同啥,對一个人來講是足重要的代誌,而且這擺教育部竟然閣是用強硬的態度,連討論的空間攏無,我想就是因為按呢才會予逐家這呢生氣。因為這擺的作業予我感覺到序大真正是厝內底一塊寶玉,因為𪜶知影的代誌,比咱閣加濟,毋管是做人做事的道理抑是對代誌思考的方式,拄到困難忍耐度,攏是咱現代人作袂到咧！所以作完這擺的作業毋但予我知影足濟歷史上發生的代誌,嘛予我心肝內對序大有閣加濟的佩服佮敬重,佮序大的感情嘛變好,希望逐家會當有閒的時陣,加佮厝內底的序大開講,按呢毋若會使序大歡喜感覺著家己的重要性,嘛會有你意想袂到的驚喜。
留言列表
