jean242113的部落格

  文化是啥物?對咱來講有啥物款的影響?欲按怎生活佇這个多元文化的社會?咱的社會文化甘是真正多元?我相信這是真濟人心肝內攏曾想過的問題,咱常常講阮台灣的文化是上特殊,毋閣佇這片予人殖民統治的國家,啥物文化才真正代表台灣的文化,是對以早就蹛佇這片寶島的原住民文化抑是後來才來的漢人文化?這是我佇參加這場哲五前,想攏無想過,但是佇主講人陳明仁老師的分析紹介了後,我對台灣的文化有更加深的了解,了解著台灣的文化不只是存在佇學校教育,真正的文化是存在佇咱的生活當中,不論是客家人的語言習俗抑是咱最近過的端午節,攏是咱文化的一部份。陳明仁老師除了是彼工哲五的講師,伊閣是一位研究台灣語言的學者,對台語有濟多研究,伊講到台灣語言的多樣性,真正的文化就應該對細漢時學起,伊講伊自細漢蹛佇一個無文化的所在,規庄內底識字的人用手指頭攏算的出來,彼的語言干焦台語和客語爾爾,所以伊自細漢就接觸到兩種文化,毋閣就算伊生活佇彼種困苦的環境,伊嘛無變成一個無文化的人,大學時伊讀的是中文系,又閣是一種文化上的衝突,就這樣濟多文化佇他身上混合,成就著今嘛的伊,伊講伊讀大學後才發現,為啥物咱一直保護推廣的文化是中國的儒家文化,但是咱日常講的台語和客語原住民文化煞變作上無水準的語言文化,甚至是予人禁止,講閣愛予人處罰,若是按呢講起來台灣真正是一個多元文化包容存在的社會嗎?若是這樣文化為啥物會有好䆀的分別?這就是咱逐家愛思考的問題!